قومی اسمبلی زینب الرٹ بل متفقہ طور تے منظور کرگھدا

قانون دے تحت 18 سال توں گھٹ عمر دے بالاں کوں اغواء‘ بجھا تے گھن ونجنڑ ‘ قتل یا زخمی کرنڑ یا ایندے نال زنا بالجبر یا نفسانی خواہشات پوری کرنڑ دے ذمہ واری کوں سزائے موت یا عمر قید تے ہک کروڑ توں ڈو کروڑ جرمانے دی سزا ڈتی ونج سگسی
اسلام آباد ۔ 10 جنوری (اے پی پی) قومی اسمبلی 18 سال توں گھٹ عمر دے بالاں دے اغواء‘ بھجا تے گھن ونجنڑ ‘ قتل یا زخمی کرنڑ یا ایندے نال زنا بالجبر یا نفسانی خواہشات پوری کرنڑ دے ذمہ وار کوں سزائے موت یا عمر قید اتے ہک توں ڈو کروڑ جرمانے دی سزا دا حامل زینب الرٹ بل متفقہ طور تے منظور کر گھدے ۔جمعے کوں وفاقی وزیر انسانی حقوق ڈاکٹر شیریں مزاری تحریک پیش کیتی جو زینب الرٹ جوابی ردعمل اتے بازیابی بل2019ءتے غور کیتا ونجے ۔ ایوان توں تحریک دی منظوری دے بعد سپیکر بل دیاں ساریاں شقاں دی ایوان توں منظوری گھدی ۔ وفاقی وزیر ڈاکٹر شیریں مزاری تحریک پیش کیتی جو گمشدہ اتے اغواءتھیونڑ آلے بالاں کیتے الرٹ کوں ودھاونڑ ‘ جوابی ردعمل اتے بازیابی کیتے احکامات وضع کرنڑ دا بل‘ زینب الرٹ‘ جوابی ردعمل اتے بازیابی بل 2019ءمنظور کیتا ونجے ۔ قومی اسمبلی بل دی منظوری ڈے ڈتی ۔ ڈاکٹر شیریں مزاری ، وفاقی وزیر اسد عمر اتے پیپلز پارٹی دی رکن ڈاکٹر مہرین رزاق بھٹو دا ایں بل دے حوالے نال کردار ادا کرنڑ تے شکریہ ادا کریندوں ۔ وفاقی وزیر اسد عمر آکھیا جو بالڑی زینب دے نال پیش آونڑ آلے واقعے دے بعد میں بل ایوان اچ پیش کیتا ہئی ۔کمیٹی ست مہینے دا عرصہ لاتا ،اساڈی پہلی ذمے واری اے جو بالاں دے تحفظ کیتے قانون بنڑاﺅں ۔ پاکستان دے بال کہیں وی طاقت ور عہدے توں ودھ اہم کائنی ۔ سینٹ وی ایں بل کوں وختی منظور کرے ۔ ڈاکٹر مہرین رزاق بھٹو بل دی منظوری تے پورے ایوان کوں مبارخ ڈتی انہاں آکھیا جو اے بل ہنڑ بہتر شکل اچ آگے ۔ زینب دی ڈوجھی برسی دے موقع تے اے بل منظور تھئے۔ ہر صوبے کوں ایں بل دی تقلید اچ قانون سازی کرنڑیں چاہیدی اے ۔ایں بل دے تحت ڈو گھنٹے دے اندر ایف آئی آر درج تھیسی تے ترائے مہینے دے اندر اندر ایں قسم دے واقعات کوں نبیڑ ڈیونڑ دی حد مقرر کیتی گئی اے ۔خمیس کوں قومی اسمبلی قائمہ کمیٹی دی طرفوں پیش کیتے گے بل اچ آکھیا گے جو ایں قانون دے تحت زینب الرٹ جوابی ردعمل اتے بازیابی ایجنسی برائے گمشدہ و اغواءشدہ اطفال (زارا) ایجنسی قائم کیتی ویسی جیں دا سربراہ ڈائریکٹر جنرل ہوسی ۔ اے بل وختی نافذ العمل ہوسی ایندا دائرہ اختیار وفاقی دارالحکومت ہوسی۔